Јунајтед во серија од три победи, првпат по 20 месеци

25 октомври 2025 - 21:20

Навивачите на Манчестер Јунајтед се во еуфорија откако нивниот омилен тим денеска ја оствари третата победа по ред во Премиер лигата и се доближи на само три бода од челната позиција на табелата на која се наоѓа Арсенал.

„Топчиите“ имаат еден натпревар помалку, но ако се знае како почна сезоната за Јунајтед, ова е фантастично сценарио во моментов. Првпат откако дојде Рубен Аморим (ноември 2024), тимот врза три победи во домашното првенство што секако позитивно ќе влијае на екипата во следниот период.

Воедно, ова е првпат Јунајтед да победи три натпревари по ред во Премиер лигата од февруари 2024 година кога серијата изнесуваше четири меча. Од 1 до 18 февруари, „ѓаволите“ тогаш ги победија Вулверхемптон, Вест Хем, Астон Вила и Лутон, но на клупата уште беше Ерик Тен Хаг.