Фиорентина ќе го издржува семејството на Астори колку што Роналдињо заигра за Чапекоенсе!
Прво почна на социјалните мрежи, а онлајн-медиумите без професионалната потреба да проверат извор, објавуваа сѐ што ќе наиде за Астори. За жал, една од најгласните вести излезе дека е лага, а на која се "фативме" и ние од Спорт1. Астори вчера требаше да потпише договор со Фиорентина кој ќе ги врзеше до крајот на неговата кареира. Тоа е вистина и клубот го потврди.
Свечената церемонија требало да се случи минатата недела, но поради лоши временски услови одложиле за оваа. Сепак, капитенот не го дочека договорот, но медиумите ја продолжија приказната. Молскавично се прошири веста дека Фиорентина го потпишала „доживотниот“ договор со Астори, така што ќе им ја исплаќа неговата плата на неговите сопруга и ќерка. Пренесоа сите медиуми, некои пишуваа и дека клубот потврдил, а всушност станувало збор за една голема лага.
Клубот се огласи по сите дрски пишувања со кратка реченица на својот официјален вебсајт.
„Фиорентина, сè уште во шок од драматичниот момент, бара само молк и почит од сите“, напишаа од клубот.
Иако веста за доживотната плата не е вистина, пишувањата се стишија до ниво дека клубот, сепак, ќе му помогне на семеството Астори со еднократна финансиска помош.
За целава медиумска бесрамност најдобро се изрази некогашниот англиски фудбалер Џони Шарплес, споредувајќи ја оваа со една друга фудбалска трагедија.
„Дали Роналдињо или Рикелме вистински понудија да играат за Чапекоенсе бесплатно? Дали Фиорентина навистина ѝ даде на сопругата на Давиде Астори доживотен договор?
Очигледно изворите не се важни за спортските профили на социјалните мрежи се додека од една трагедија се раѓа добра приказна“, напиша Шарплес.
Did Ronaldinho and Juan Roman Riquelme actually offer to play for Chapecoense for free? Have Fiorentina really given Davide Astori's wife a "contract for life"?
— Jonny Sharples (@JonnyGabriel) March 5, 2018
Sources don't seem to be important for social media sports accounts if there's a good story born from a tragedy.
Со тоа потсети како светските медиуми ја злоупотребија кобната авионска несреќа на Чапекоенсе, пишувајќи дека Роналдињо, Рикелме и уште некои ѕвезди се нуделе да играат бесплатно, од сочувство кон клубот. Наместо тоа, раководството „увезе“ цела нова екипа и почна од нула за да остане на нозе.
Затоа, госпоѓа Астори доби доживотна плата, исто колку што Роналдињо заигра за Чапекоенсе.