Трамп го виде најдобриот фудбалер на сите времиња (ВИДЕО)

Посетата на Интер Мајами на Белата куќа е дел од традиционалната практика во САД, шампионите на големите спортски лиги да доаѓаат на прием кај претседателот, а централна фигура на церемонијата беше, за многумина, најдобриот фудбалер во историјата на фудбалот и осумкратен освојувач на Златната топка Лионел Меси, кој присуствуваше на церемонијата во Белата куќа со своите соиграчи. Во таа пригода, Меси му подари на претседателот Трамп посебна розова фудбалска топка потпишана од играчот, додека претставниците на клубот му подарија и дрес на Интер Мајами со бројот 47, што го симболизира претседателскиот мандат на Трамп.

За време на својот говор, Трамп особено го пофали влијанието на Меси врз историскиот успех на клубот и општата популаризација на фудбалот во Америка.

„Одлична работа! Огромна привилегија е за мене да можам да кажам нешто што ниту еден американски претседател досега немал можност да го каже: Добредојде во Белата куќа, Лионел Меси. Лео дојде и веднаш победи, а тоа е многу тешко да се направи, многу, многу необично и искрено, има многу поголем притисок врз вас отколку што некој може да замисли. Бидејќи од вас се очекува да победите, а речиси никој друг не победува туку-така“, рече Трамп кој првпат се сретна со Меси.

Меси стана првиот играч во историјата што ја освоил наградата за најкорисен играч (МВП) во две последователни сезони во МЛС, а титулата во САД го направи играч со најмногу трофеи во историјата на фудбалот. И за тоа, Трамп му е благодарен на Аргентинецот.

„Можеше да одиш каде било во светот, во кој било тим, а го избра Мајами. Само сакам да ти се заблагодарам што нè поведе сите на ова патување“, додаде Трамп пред да открие дека неговиот син е голем обожавател на Меси, но и на Роналдо, кого 45-тиот и 47-миот претседател на Соединетите Американски Држави веќе имал можност да го сретне во неколку наврати. „Мојот син Барон ми рече: „Тато, знаеш ли кој ќе биде таму денес?“ Јас реков: „Не, зафатен сум со многу работи во моментов.“ Тој рече: „Меси! Мислам дека неодамна се запознавте. Тој е голем фудбалски навивач, но е и голем ваш обожавател... и еден господин по име Роналдо“, рече Трамп, предизвикувајќи насмевки кај сите во просторијата.

Покрај играчите на Интер Мајами, на церемонијата присуствуваа и бројни членови на клубот и спортски службеници, вклучувајќи го сопственикот на клубот Хорхе Мас, комесарот на МЛС, Дон Гарбер, и неколку познати личности од светот на спортот. Меѓу играчите што дојдоа во Вашингтон беше и Луис Суарез.

Церемонијата имаше и неколку комични моменти за кои се погрижи американскиот претседател. Прво ги праша фудбалерите на Интер Мајами дали е подобар Меси или Пеле, а потоа, откако се поздрави со Родриго де Пол, на смеа праша дали има некој грд фудбалер во тимот од Флорида.