Панчев го шокира Балканот: За „нашите“ екипи е подобро да не играат во ЛШ!

14 декември 2025 - 09:38

Поранешниот фудбалер на Црвена звезда и некогашен македонски репрезентативец, Дарко Панчев, смета дека настапот во Лигата на Европа е поповолна и пореална опција за клубовите од Балканот, отколку борбата во Лигата на шампионите, каде што, според него, разликата во квалитет е преголема.

„Ако сме фудбалски реални и објективни, за сите балкански клубови – не само за Црвена звезда и Партизан, туку и за Динамо, Хајдук и другите – многу е подобро и покоректно да играат во Лигата на Европа. Тука квалитетот е на ниво што е поблиску до нашето и објективно имаме поголеми шанси да освојуваме бодови, да победуваме и да се радуваме“, истакна Панчев во изјава за ТВ Танјуг.

Тој посочи дека и пласман меѓу првите 24 екипи во Лигата на Европа би бил успех за Црвена звезда и дека „црвено-белите“ имаат реални шанси да продолжат понатаму.

„Јас би бил задоволен Звезда да влезе меѓу првите 24. Имаме објективни шанси против Малме, кој има само еден бод и реално е без големи изгледи за пласман. Тоа треба да се искористи – да се одигра добро и да се освојат бод или три. Против Селта ќе биде многу потешко, шпанските екипи каде и да играат се силни и организирани“, изјави Панчев.

Според него, евентуалното „презимување“ во Лигата на Европа и влезот во елиминациската фаза би бил релативен, но значаен успех, по што би следел поинаков тип на натпреварување и размислување. Панчев призна дека Лигата на шампионите е далеку поисплатлива од финансиски аспект, но нагласи дека тоа е практично и единствената причина поради која клубовите од регионот ја „бркаат“ елитната конкуренција.

„Лигата на шампионите ја бркаме само поради парите. Но ако гледаме фудбалски, Лигата на Европа е многу попогодна за нашите клубови“, заклучи легендарниот голгетер.