„Цела Франција го мрази ПСЖ!“

Една од причините за тоа е фактот што овој клуб нема долга и богата историја како останатите европски гиганти, со оглед што е формиран во 1970 година, а втората е што како единствен силен тим од престолнината секогаш е пречекуван на нож кај останатиот дел од „провинцијата“.

„Една година бев во ПСЖ и го освоивме Купот на победниците на купови, што беше прва интернационална титула за клубот. Се сеќавам и кога мојот татко играше таму, тоа беа почетоците на ПСЖ, а ‘Паркот на принцовите’ се градеше тогаш. Мојот брат и јас игравме фудбал на теренот и следниот ден бевме на насловната на ‘Л’Екип’ со порака – ‘Принцовите на Паркот на принцовите’. Таа фотографија секогаш ја носам со мене. ПСЖ е млад клуб, но има одлична ДНК и е одлично место за играње фудбал. Но, кога играш за ПСЖ, се бориш против остатокот од Франција. Луѓето навистина го мразат ПСЖ. Шпанија е поделена помеѓу Реал Мадрид и Барселона. Во Франција има луѓе кои го сакаат Олимпик Марсеј, но тие кои не се навивачи на ОМ, не ги мразат, туку не им е грижа. Истото е и со Лион. Но, не е така со тимот од Париз. ПСЖ го мразат сите кои не се негови навивачи. Тоа е уникатно“, вели Џоркаеф.

Дополнителна причина за ваквата омраза е и неговиот богат газда, кој во последните години се расфрла со пари, што кулминира сезонава откако на едно место донесе многу ѕвезди, нешто што досега се нема случено во светскиот фудбал.