„Потребни ни се екстра странци во лигата - тие ќе бидат учители на нашите македонски деца!

Немам ништо против странците. Напротив квалитетен странец секогаш треба да биде добредојден во Македонија. Јас кога бев дете имавме екстра квалитетни странци од кои учев и јас. Потребни ни се и сега за да бидат учители на овие наши македонски деца кои се од помладите категории. Ние заостануваме, но срцето, желбата, вербата и љубовта кон ракометот прави некогаш да сме нереални и да посакуваме нереални работи. Но јас верувам во чуда и ќе тежнееме кон тоа и понатаму, вели Лазаров.

Тој истакна и дека на Македонија не ѝ одговара турнирски начин на игра и дека во квалификации подобро се снаоѓаме. 

Во квалификациите знаеме да одиграме добро и против поквалитетни репрезентации, но кога ќе дојде системскиот турнир ни е потешко. Денеска правев муабет и со Словенците кои имаа три перфектни натпревари, се видов со Зорман и му 'велам каде одите - вика одиме во Хамбург и играме со Шведска, Данска и Холандија'... Навистина треба да имате квалитетен ростер за да бидете компетативни. Ние во моментов можеме да одиграме два-три натпревари, но замислете да треба да одиграме уште три меча со вакви квалитетни противници... Треба да се работи, 95 проценти од играчите ни се од македонската лига која е сѐ подобра, но треба уште да се вложува да се дава шанса на македонските играчи, да се вложува во стручен кадар, во тренажен процес за тие играчи да се усовршуваат. Мислам дека целата македонска јавност е задоволна. Под импресии сме, но цврсто на земја. Во победите се радуваме сите, но од поразите правиме трагедија, го разбирам тоа бидејќи Македонија навива со срце за своите репрезентации.

Според него, менувањето на менталитетот е долг процес.

Успеваме да го промениме менталитетот, се надевам дека ова е првиот чекор кон тоа. Дали вечерва имав страв во финишот од пораз? По 45. минута паднавме енергетски, се обидувавме на неколку начини да се одржиме, изгубивме доста енергија, играчите на Швајцарија имаат силни мечеви преку целата сезона, на нив не им недостасува таа енергија, но успеавме некако и со ротација и со спортска среќа која ја заслуживме. Се боревме до крај, имавме сплотеност, жар, борба и на крајот ја заслуживме победата. Ова не беше ништо стратегиски, ништо тактички, пред мечот им кажав момци само борба. Не беше лесно да се мотивираат ракометарите по поразите од Франција и Германија, но успеавме - победивме.

„Ова е вредна победа од повеќе причини. Швајцарија е екстра квалитетна репрезентација, тоа го покажа и на ова првенство, но и со игрите во изминатите неколку години, имаат екстра индивидуалци кои се претворени во добар тим. Имаа желба да завршат со победа поради легендата на светскиот ракомет Енди Шмид на кој ова му е последен меч и ќе го преземе кормилото на Швајцарија како селектор од лето. Сакаа да направат поголем успех поради него, но не им се оствари. Ние навистина бевме квалитетни, она што го пропуштивме во претходните два меча против уште поквалитетните противници како Германија и Франција каде што имавме многу технички грешки, но сега ги намаливме двојни, можеби и повеќе и тоа е рецептот за успех. Немавме многу примени голови од контра. Нашата одбрана беше подобра и допринесе и нашите голмани да бидат квалитетни, имавме и глава и опашка и во нападот знаевме што правивме. Им дадовме 29 гола, тоа не успеаа да го направат ниту Франција ниту Германија против нив. Не е лесно да се игра против таа грантина одбрана на Швајцарија.