Скандал на СП: Словенците биле затруени пред дуелот со домаќинот Египет!

Ракометната репрезентација на Словенија не се пласира меѓу осумте најдобри селекции на Светското првенство (СП), откако ремизира во клучниот меч со домаќинот Египет (25-25).

Средбата ја следеа многу контроверзи и тоа не само „домаќинското судење“ какво што традиционално има на вакви големи натпреварувања, туку и своевиден скандал со труење со храна во пресрет на натпреварот. Според информациите, осум словенечки ракометари имале стомачен вирус, повраќале и имале дијареја поради храната која им била послужена во хотелот, нешто за што никој не мисли дека е случајност.

„Има многу работи што сакам да ги кажам, но знам дека не смеам и дека мора да се гризнам за јазик. Дадовме сѐ што имавме. Нѐ уништија сопствените глупости, но и туѓите. Половина тим не излегуваше од тоалет ден пред натпреварот и на самиот дел на средбата. Тројца не можеа да играат, а некој постојано повраќаше. Истото им се случи и на Хрватите. Сето тоа ми е некако чудно, изјави капитенот на Словенија, Јуре Доленец.

Селекторот Љубомир Врањеш ги пофали своите избраници што воопшто собрале сили да го одиграат овој дуел.

„Имавме осум играчи со здравствени проблеми, а дури и во такви услови имавме можност за победа. На целиот турнир имавме еден пораз и не се пласиравме во четвртфиналето, што е трагедија“, изјави Врањеш.

Ракометарот Блаж Јанц во само една реченица најдобро ги оцени работите.

„Секој кој следи ракомет виде што ни се случи. Нема назад“, изјави Јанц.