Карачиќ: Не сум тажен, пресреќен сум - за ова може книга да се напише!

02 февруари 2025 - 20:34

Поранешниот ракометар на Вардар, Игор Карачиќ принудно влезе во хрватската репрезентација на ова Светско првенство и имаше шанса на најдобар начин да се прости од репрезентацијата.

Карачиќ вели дека не е тажен поради поразот во финалето, напротив, тој е среќен поради големиот успех на Хрватска и освоеното второ место.

„Не сум тажен воопшто. Ми беше преубаво сите овие денови да го делам теренот, соблекувалната и хотелот со овие момци. Пресреќен сум. Можеби можеше чувството да биде уште подобро на крајот, но не можев да посакам нешто поубаво од простување со медел и мирно да ја оставиме репрезентацијата на овие момци“, рече Карачиќ по мечот.

„Секоја медела ми е драга, но на оваа не се надевав. Се водеше кон тоа дечките да одат без мене. Но ме викнаа и дојдов. За ова што се случуваше може книга да се напише. Најважно е дека во Хрватска завршивме онака како што сакавме, со победи го завеселивме нашиот народ“.