Српски кошаркар приведен на влез во Хрватска зашто на меч од АБА покажал – три прсти!

29 јули 2025 - 12:13

Српскиот кошаркар, Филип Барна, приведен на граничниот премин Бајаково при обид да влезе во Хрватска, поради прекршочна пријава поврзана со инцидент од април годинава, кога при прослава на тројка подигнал три прста – гест кој хрватските власти го сметаат за провокативен симбол.

Инцидентот се случил на натпревар од АБА лигата, кога Барна постигнал 21 поен и бил еден од најдобрите кошаркари во победата на ФМП против домашниот Сплит (85-72). По тројката, тој го подигнал симболот „три прста“, што довело до навреди од домашната публика и подоцнежна прекршочна пријава од страна на хрватското правосудство. Министерството за внатрешни работи на Србија соопшти дека Барна на 28 јули 2025 во 10:41 часот излегол од Србија преку граничниот премин Батровци. Подоцна, во 12:50 часот, српските гранични служби биле информирани од хрватските власти дека Барна е запрен на влез во Хрватска, на преминот Бајаково, поради неплатена казна од 550 евра.

Кошаркарот ја платил казната и веднаш му било дозволено да го продолжи патувањето. Филип Барна (26) ја заврши сезоната како играч на ФМП, претходно настапуваше за Спартак, а летово се споменуваше како потенцијално засилување за Црвена звезда.