Со победа над директниот ривал: Куманово направи огромен исчекор кон плејофот!
Домаќинот уште од самиот старт го наметна својот стил на игра и го диктираше темпото, што резултира со плус девет уште во првата четвртина (21-12), предност која во вториот период беше зголемена и на 14 поени разлика (39-25). Тоа, сепак, не ги деморализира гостиварци, кои полека, но сигурно ја намалуваа негативата и дојдоа на само минус два (50-52) на крајот од третиот квартал. Кумановци потоа дојдоа и до 69-59, но како да застанаа што избраниците на тренерот Марјан Србиновски максимално го искористија и со девет поени во низа дојдоа на само минус еден поен (68-68) на една минута до крајот. Но, следуваше кош со фаул и прецизно слободно на Никола Караколев за крај на сите дилеми на овој меч.
Куманово сега има две победи повеќе од Гостивар (17-15) што ги става во пол-позиција за обезбедување на последното место кое води во доигрувањето и кое во полуфиналето од плејофот ќе им донесе пресметка со лидерот Работнички.
Бобан Стајиќ со 17 и Мирко Ковач со 16 поени беа најефикасни кај сино-белите од најсеверниот македонски град, додека Александар Штерјов и Бранислав Ѓекиќ реализираа по 11 поени. Диме Тасовски беше убедливо најдобар кај Гостивар со 22 поени и девет скока.
Синоќа, во склоп на истата рунда, МЗТ Скопје како гостин го совлада АВ Охрид, а вечерва Работнички го доби дербито со Блокотехна одиграно во Гевгелија.
ТАБЕЛА: Работнички 26-1, Блокотехна 20-7, МЗТ Скопје 20-7, Куманово 17-10, Гостивар 15-12, АВ Охрид 11-16.