Фелипе ќе дебитира за Шкендија, ако тетовци имаат убедливо водство

15 јули 2019 - 12:36

Големото засилување на тетовска Шкендија, Бразилецот Фелипе, доскорешниот фудбалер на Вардар утре од клупата за резерви ќе го чека своето деби во црвено-црниот дрес и шанса ќе добие само ако тетовци имаат убедливо водство против естонски Номе Калју во реваншот од првото коло во квалификациите за ЛШ.

Фелипе во Шкендија потпиша пред десет дена, а од саботата почна со тренинзи, но е тотално неподготвен и сега ќе мора да ги стигне соиграчите во физичката подготовка пред да почне да конкурира за првиот тим. Бразилецот, кој остави силен белег во Вардар е доведен за да го засили средниот ред и да го подигне квалитетот, пред се во креацијата.

„Фелипе е во комбинација за овој меч, но дали ќе (за)игра ќе зависи од резултатот кој ќе биде на мечот. Фелипе дојде пред неколку дена и физички не е подготвен. Сѐ ќе зависи од резултатот утре“, најави тренерот Ќатип Османи.