Ачерби збесна на навивач на ПСЖ: Луд сум – ќе те претепам (ВИДЕО)

21 јуни 2025 - 17:22

Фудбалерот на Интер, Франческо Ачерби, влезе во вербален конфликт со навивач на ПСЖ за време на промотивен настан во Сиетл во рамки на Светското клупско првенство (СКП) во САД, откако беше исмеан поради неколкуте загубени дуели со Бредли Баркола од финалето на Лигата на шампионите.

Инцидентот се случил кога навивач, облечен во дрес на ПСЖ, му пријде на Ачерби и саркастично го пофали Баркола, потсетувајќи го на една ситуација од убедливиот пораз на Интер со 5-0 во финалето. Тоа предизвика жестока реакција кај 37-годишниот дефанзивец.

„Сериозен сум, не сакам да се прават шеги на моја сметка. Ако кажеш ‘Ачерби-Баркола,’ тоа не е во ред. Луд сум. И ќе те претепам,“ му возвратил фудбалерот, откако вработен во Интер се обидел да му ги преведе зборовите на навивачот.

Интер ремизираше во првиот меч на СКМ против мексиканскиот тим Монтереј (1-1), а вечерва ќе го одигра вториот дуел од групната фаза и тоа против јапонскиот состав Урава.