Здравковски: Очекувајте мотивирана Македонија против европскиот првак!

13 ноември 2019 - 13:02

Младата македонска фудбалска репрезентација утревечер во Алкоркон ќе се соочи со актуелниот европски младински шампион Шпанија во евроквалификацискиот меч за пласман на Евро 2021 во Словенија и Унгарија, а црвено-жолтите надежи и покрај сите проблеми околу опремата со кои се соочија неочекувано, мотивирани се да ја изненадат „црвената фурија“.

Шпанија е апсолутен фаворит во групата, но македонските избраници на селекторот Благоја Милевски не се предаваат однапред и ќе се обидат да направат изненадување

„Утре нѐ очекува натпревар против една од најдобрите европски репрезентации. Шпанија е топ фаворит во групата, но и силен мотив за нас, но очекувајте мотивирана Македонија со цел квалитетно да им се спротивставиме на домашните фудбалери“, вели Давор Здравковски, капитенот на селекцијата и фудбалер на кипарски АЕЛ Лимасол.

Македонија по три кола има седум бода и во во врвот на табелата, па сега Шпанија им е најголемиот испит за потенцијалот за нов настап на континенталниот собир на таленти. После овој меч, македонските надежи имаат и меч со Фарски острови на гости.

„Овие квалификации ги започнавме со добри резултати и ќе направиме сѐ за да го продолжиме тој пат. Ветуваме голема борба и максимална ангажираност од сите во репрезентацијата“, додава Здравковски.