Јамал доби „дадилка“ за социјални мрежи – му забранија сам да објавува постови!

28 октомври 2025 - 16:09

Големиот бисер на Барселона, Ламин Јамал, добива „дадилка“ за социјални мрежи, односно отсега неговите постови ќе мора да бидат проверени од раководството на клубот и од неговиот менаџер, Жорже Мендеш пред да бидат објавени, пренесуваат шпанските медиуми.

Одлуката доаѓа откако 17-годишниот офанзивец предизвика бурни реакции со својата изјава за Реал Мадрид, тврдејќи дека „на Сантијаго Бернабеу плачат и крадат“. Коментарот се прошири со огромна брзина и дополнително ја вжешти атмосферата пред Ел Класико, кој заврши со тензична завршница и расправии меѓу фудбалерите.

Во Барселона сметаат дека талентираниот тинејџер понекогаш претерува со своите јавни настапи и дека тоа може да му наштети и нему и на имиџот на клубот. Затоа, Мендеш ќе има задача да ги прегледува и одобрува сите содржини пред нивна објава.

Барселона и менаџерот на Јамал отсега ќе го советуваат и ќе го насочуваат во неговото однесување на интернет – со цел да го заштитат од непотребни контроверзии и медиумски притисок што може да го наруши неговиот развој.

ФОТО: EPA PHOTO