Новиот газда на Победа почнува со работа, формиран е нов Управен одбор

25 април 2025 - 07:35

Се одржа Собранието на ФК Победа, формиран е нов Управен одбор, а за претседателка на клубот е назначена Јана Мицковска - Поповски која е сестра на новиот сопственик на клубот од САД, Александар Мицковски.

Победа врти нов лист, а навивачите се надеваат дека ветувањата на новите газди ќе бидат исполнети, па клубот ќе заплови по позитивни води и за кратко време ќе се врати во најдобрата македонска лига.

Новиот Управен одбор го сочинуваат Небојша Стојковиќ, Владимир Мирчески, Сашко Попоски, д-р Весна Неделковска, Јана Мицковска – Попоски,  Димитар Трајков, Горан Зечевиќ и Александар Крстески.

Прв човек на Победа ќе биде Јана Мицковска - Поповски, сестрата на сопственикот Александар Мицковски кој живее во САД. По седум години прилепскиот клуб повторно ќе има жена претседател, тогаш беше Ирена Јакимовска.

Новите сопственици ветуваат дека ќе го „воскреснат“ клубот и Прилеп повторно ќе биде еден од најфудбалските градови во Македонија.

Фото: ФК Победа/фб