Домен Превц испиша историја на „Четири скокалници“ - победи 10 години после својот брат!

Домен ја трасираше победата уште на стартот на турнејата со убедливи триумфи во Оберсдорф и Гармиш-Партенкирхен. Иако во Инсбрук „само“ се искачи на подиумот, сè беше решено по првиот скок во Бишофсхофен – лет од 138 метри и 150 бодови му гарантираа трофеј без оглед на исходот во финалната серија. Во вториот скок заврши втор, но сигурно ја обезбеди победата во генералниот пласман.

Тој со ова стана третиот Словенец што победил на оваа новогодишна турнеја, по својот брат Петер и Примож Петерка, а воедно го продолжи неверојатниот континуитет – 12 настапи по ред на подиум. Единствениот пораз го доживеа во Инсбрук, каде Јапонецот Рен Никаидо го победи за само половина бод, но Бишофсхофен беше само формалност. Паралелно со успехот на браќата, семејството Превц доби уште еден значаен момент. Ника Превц, најмладата во семејството, денеска победи на натпреварот во Вилах, на 140 километри од Бишофсхофен. Со скокови од 92 и 89,5 метри, за половина бод ја надмина Лиза Едер, а на подиумот се искачи и Агнес Рајш. Со оваа победа Ника го презеде водството во генералниот пласман, позиција што веќе ја освојуваше и во претходните две сезони.

Успешната приказна на семејството Превц не завршува тука. Средниот брат Цене Превц, роден пред 29 години во Крањ, во кариерата освои олимписко сребро на Игрите во Пекинг 2022, имаше еден пласман на подиумот и по најдобрата сезона во животот во 2022 година се повлече од активното натпреварување.