Венус Вилијамс во полуфинале на Индијан Велс првпат по 17 години

16 март 2018 - 10:14

Венус Вилијамс ќе полни 38 години во јуни, но тоа не ја спречува да игра подобро од мнозинството тенисерки на ВТА-турнеата. Последниот доказ дека живее втора младост го почувствува Шпанката Карла Суарез Наваро.

Венус ја совлада Наваро со 6-3, 6-2 за нешто повеќе од еден час и се пласира во полуфиналето. Последен пат играла меѓу најдобрите четири на Индијан Велс уште во 2001 година. Нејзината следна противничка, тогаш се уште немала фатено рекет в рака, бидејќи уште немала полни четири години. 

Тоа е Дарија Касаткина, 20-годишната Русинка, која продолжи да импресионира совладувајќи ја Анџелик Кербер (6-0, 6-2), пласирајќи се првпат во полуфинале на еден вака голем турнир. Во второто се среќаваат првата светска тенисерка, Симона Халеп и Јапонката Наоми Осака.