Синер во два сета го реши Филс за финале во Мадрид (ВИДЕО)

01 мај 2026 - 18:19

Првиот тенисер на светот, Италијанецот Јаник Синер, се пласираше во финалето на АТП Мастерс турнирот во Мадрид, откако во полуфиналето рутински го совлада францускиот тенисер Артур Филс со 2-0 во сетови (6-2, 6-4).

Иако Филс добро го отвори мечот и го освои својот прв сервис за водство од 1-0, следуваше силен одговор на италијанскиот тенисер. Синер експресно направи два брејка и врза пет гема во низа, доаѓајќи до недостижни 5-1. Французинот до крајот на сетот успеа да освои уште само еден гем на свој сервис, по што Синер рутински сервираше за конечни 6-2 во првиот сет, кој траеше нешто повеќе од половина час.

Вториот сет донесе поголема борба и отпор од младиот Французин. Двајцата тенисери ги чуваа своите сервиси, а Филс постојано водеше и вршеше притисок врз Синер. Се играше гем за гем сè до резултат 4-4.

Тогаш Синер успеа да го скрши отпорот на Филс и да направи клучен брејк за водство од 5-4. Во следниот гем, Синер сигурно сервираше за победа и конечни 6-4 во вториот сет.

Во финалето Италијанецот ќе игра против подобриот од второто полуфинале помеѓу Александар Зверев и Александар Блокс.

Фото: ATP Tour/X