Лазаров: Задоволен сум од ждрепката, имаме реални шанси да се пласираме на ЕП

Нашиот национален тим доби противници по мерка и има можност да ја продолжи серијата настапи на големите натпреварувања. Македонија ќе игра со Естонија, Литванија и Словенија, ривали со кои може да се надева на (нај)висок пласман.

„Задоволен сум од ждрепката, мислам дека имаме реални шанси да се пласираме на следното Европско првенство. Не смееме во ниту еден случај да ги потцениме селекциите на Естонија и на Литванија, додека со Словенците ќе пробаме да извојуваме барем една победа. Знаеме дека се работи за квалитетен национален тим кој што успеа да обезбеди олимписка виза за Париз 2024 година“, изјави Лазаров.

Македонија досега има осум учества на европските шампионати, а во моментов е во серија од седум настапи, почнувајќи од 2012 година. Играше и на континенталниот шампион што се одржа во јануари годинава во Германија и го освои 17. место.