Ѓер е прв финалист во Лигата на шампионите - утре ќе ја брани титулата

31 мај 2025 - 16:45

Шесткратниот европски првак Ѓер обезбеди пласман во финалето од Лигата на шампионите откако попладнево го совлада Есбјерг со 29-28 во првиот полуфинален натпревар.

Сценариото е слично како лани бидејќи и тогаш во полуфиналниот меч се сретнаа овие две екипи и исто така беше подобар унгарскиот тим, со еден гол разлика. Попладнево Ѓер го диктираше темпото, ниеднаш не се најде во негатива, а цело второ полувреме беше во водство.

Највисокото изнесуваше четири разлика (19-15) на стартот од второто полувреме, Есбјерг нешто подоцна се доближи на еден гол негатива и тоа во неколку наврати, но не успеа целосно да ја анулира.

Хусхер со седум гола беше најефикасна во победничкиот тим, Нзе Минко постигна пет, а Хе и Дале по четири. Кај Есбјерг, Реистад исто така имаше седум гола. Утре Ѓер ќе се бори за седмата титула во Лигата на шампионите, а противник ќе му биде подобриот од дуелот меѓу Мец и Оденсе.

фото: EPA Photo