Ибрахимовиќ и Анри ја запеаја навивачката химна на БиХ среде пренос во живо (ВИДЕО)

13 јуни 2026 - 09:07

Поранешните фудбалски ѕвезди, Златан Ибрахимовиќ и Тјери Анри, предизвикаа големо внимание за време на телевизиското покривање на СП 2026, откако во живо ја запеаја познатата песна на групата Дубиоза Колектив „I Am From Bosnia, Take Me to America“.

Двајцата се дел од стручниот тим на телевизијата „Фокс Спортс“ за следење на Мундијалот во САД, Канада и Мексико, а интересниот момент се случи во најавата за натпреварот меѓу Канада и БиХ, кој се одигра во Торонто. Ибрахимовиќ започна со стиховите „I’m from Bosnia“, по што Анри се надоврза со „Take me to America“, предизвикувајќи насмевки кај присутните во студиото и бројни реакции на социјалните мрежи.

Посебна тежина на овој момент му дава фактот што и двајцата имаат силна поврзаност со БиХ. Таткото на Ибрахимовиќ, Шефик, потекнува од БиХ, додека Анри е во брак со Андреа Рајачиќ, која е родена во Сараево. Ибрахимовиќ и претходно јавно ја поддржа босанската репрезентација, изјавувајќи дека „босанска крв тече низ неговите вени“ и дека очекува добар настап на селекцијата на СП, но потоа и призна дека ќе навива за Хрватска на ова натпреварување.

Босанците настапот на Мундијалот го отворија со реми против Канада (1-1). За водство на БиХ погоди Јово Лукиќ во 21. минута, а конечниот резултат го постави Сајл Ларин во 78. минута.