ДЕНЕСКА НА СП: Првпат четири меча, Бразил пред голем африкански предизвик!

13 јуни 2026 - 09:48

Третиот натпреварувачки ден на СП 2026 носи вистинска фудбалска маратонска програма со вкупно четири натпревари, кои ќе се играат од вечерните часови па сè до раните утрински часови по македонско време.

Група Б: Катар – Швајцарија (21:00)

Швајцарија е апсолутен фаворит во оваа група во која се и Канада и БиХ и би било огромно изненадување ако не завршат на првото место. Катар, по сè изгледа, ќе се бори за третото место во групата, но бодови ќе бара во некој друг натпревар.

Група Ц: Бразил – Мароко (недела, 00:00)

Спектакл и дерби на денот. Бразил започнува нов циклус со селекторот Карло Анчелоти против четвртопласираната репрезентација од претходното Светско првенство. Бразилците ја чекаат светската титула повеќе од 20 години и ќе видиме дали искусниот Италијанец ќе успее да им ја донесе. Најголема ѕвезда на тимот е Винисиус Жуниор, додека легендарниот Нејмар не е во препознатлива форма, а згора на тоа е и повреден па сигурно нема да игра вечерва. Од друга страна, Мароко се потпира на еден од најдобрите бекови во светот, Ашраф Хакими.

Група Ц: Хаити – Шкотска (недела, 03:00)

Шкотска во овој дуел е апсолутен фаворит и сè освен победа на Европјаните би било големо изненадување. Хаити е една од репрезентациите на кои им се даваат најмали шанси за пласман во шеснаесетина финалето.

Група Д: Австралија – Турција (недела, 06:00)

Турција се враќа на Мундијалот по 24 години и ќе сака да остави силен впечаток. Тешко е да се замисли дека можат да го повторат успехот од СП 2002 кога беа полуфиналисти, но во ликот на Арда Ѓулер и Кенан Јилдиз имаат млади ѕвезди кои можат да го обележат шампионатот.