Ѓоковиќ за една минута во Ријад заработи колку просечен Македонец за – три години!

17 октомври 2025 - 12:38

Додека просечниот Македонец со месечна плата од околу 650 евра треба да работи речиси три години за да заработи околу 22.000 евра, толкав износ инкасира Новак Ѓоковиќ за само една минута игра на егзибицискиот турнир „Шест кралеви“ во Саудиска Арабија.

Богатите шеици повторно ја демонстрираа својата финансиска моќ, па буквално се расфрлаа со пари на егзибицискиот спектакл во Ријад, каде што во финалето ќе се сретнат Карлос Алкараз и Јаник Синер. Двајцата лесно ги совладаа своите противници во полуфиналето и тоа Шпанецот го победи Тејлор Фриц (6-4, 6-2), додека Италијанецот го елиминираше Новак Ѓоковиќ со ист резултат.

Секој од шестмината учесници доби 1,5 милиони долари, додека победникот ќе инкасира уште 4,5 милиони, што значи дека вкупната заработка може да достигне и 6 милиони долари — повеќе дури и од наградите на најголемите гренслем-турнири. Ѓоковиќ одигра само еден меч, во кој освои шест гема и така заработи околу 250.000 долари по гејм, односно околу 22.000 евра за секоја минута на терен.