Пелистер денеска испишува клупска историја – ќе дебитира во Европа!

Италијанскиот претставник влегува во мечот како голем фаворит, но тренерот Боро Даскаловски најави дека неговите играчи ќе дадат максимум за да дојдат до позитивен резултат.

„Реџо Емилија е исклучително квалитетен тим, предводен од грчкиот тренер Пифтис, кого добро го познавам. Нивните странски кошаркари се на високо ниво веќе многу години и за нас е чест што играме против ваков ривал. Ќе дадеме сè од себе да го претставиме клубот на најдобар можен начин, но и македонската кошарка. Ваквите настапи се вистински пат за стекнување искуство и подигнување на квалитетот“, изјави Даскаловски.

Пелистер во Самоков ќе настапи со проблеми во рекетот, бидејќи Џордан Скипер Браун го напушти клубот поради семејни причини, а Ленгстон Вилсон не е регистриран навреме за ФИБА. Без оглед на исходот од настапот на овој турнир, „зелено-белите“ веќе обезбедија европска есен – во групната фаза од ФИБА Купот ќе ги чекаат Цедевита Јуниор (Хрватска), Патриоти Левице (Словачка) и Керавнос (Кипар).