Пелистер загуби, но не се посрамоти во квалификациите за ЛШ (ФОТО)

19 септември 2025 - 17:13

Македонскиот прволигаш Пелистер дебитира со пораз од италијанска Реџо Емилија со 87-99 во рамки на квалификацискиот турнир за пласман во Лигата на шампиони (ЛШ) на ФИБА, меѓутоа даде поголем отпор од очекувањата, иако играа без Американците Џордан Скипер Браун и Ленгстон Вилсон.

Реџо Емилија уште на стартот на мечот во Самоков покажа дека ќе ја контролира играта на теренот и успеа да ја добие четвртината со 31-23. Битолчани не успеаја да му парираат на ривалот ниту во вторите 10 минути, каде што италијанскиот тим беше одличен во нападот и замина на паузата со убедливи +16 (58-42).

Надежта на Пелистер почна да се враќа за момент во третата четвртина, кога битолчани од -18 стигнаа на само -7 поени (59-66), но набрзо Реџо Емилија ја врати двоцифрената предност (74-60).

Пелистер до крајот на натпреварот не успеа да се врати во ритам, додека Реџо Емилија ги користеше сите шанси за дополнително да го зголеми водството и да триумфира со 99-87.

Квон Читем Јуниор беше најефикасен во победничкиот тим со 22 постигнати поени, пет скокови и четири асистенции, додека Кевин Брејси Дејвис запиша 20 поени, шест скокови и две асистенции за Пелистер.

„Зелено-белите“ без разлика на резултатите на турнирот веќе обезбедија европска есен, односно во групната фаза од ФИБА Купот ќе ги чекаат Цедевита Јуниор (Хрватска), Патриоти Левице (Словачка) и Керавнос (Кипар).

Фото: FIBA Champions League