Реал Мадрид ѝ „удира контра“ на Барса – не дозволува играње средби во САД!

Фудбалската федерација на Шпанија во понеделникот го одобри барањето дуелот меѓу Виљареал и Барселона од 17. коло да се одигра на „Хард Рок“ стадионот во мајами (20 декември). За реализација на планот, ќе бидат побарани дозволи од УЕФА и ФИФА, а Виљареал најави дека на своите сезонски претплатници ќе им обезбеди бесплатен пат и влезници.

Од „кралскиот“ клуб соопштија дека веќе презеле мерки за спречување на натпреварот, посочувајќи дека тој е договорен без претходна консултација со сите учесници во првенството. Реал предупредува дека ваквата одлука го нарушува принципот на територијален реципроцитет – играње еден натпревар дома и еден на гости – со што се дава неоправдана спортска предност на одредени клубови.

„Ова е неприфатлив преседан што отвора врата за одлуки базирани на профит, директно загрозувајќи го спортскиот интегритет и фер-плејот“, стои во соопштението на Реал.

Клубот побара од УЕФА, ФИФА и надлежните спортски органи во Шпанија да ја одбијат иницијативата, нагласувајќи дека секоја промена од ваков карактер мора да има едногласна согласност од сите клубови, согласно националните и меѓународните правила за организација на официјални натпревари.

ФОТО: EPA PHOTO