Трипл-дабл на Андерсон, Охрид го шокира Феникс

Охриѓани триумфираа во „Јане Сандански“ со 100-90 што е нивна втора победа во последните три кола, а вкупно петта во сезоната. Со неа ја прескокнаа Академија ФМП, а се израмнија со Кожув на деветтата позиција на табелата.

Шокантен за Феникс беше почетокот на натпреварот, резултатот беше израмнет само шест секунди, Охрид отвори со 6-0, во петтата минута водеше со 18-5, а на крајот од првата четвртина имаше огромни 39-15. Таквата игра продолжи и во вториот квартал во кој гостите ги достигнаа највисоките +28 (58-30) иако во последните 90 секунди Феникс направи 8-0 за пред паузата да ја намали негативата.

Во вториот дел домашниот тим покажа знаци на будење, до крајот на третата четвртина намали на 10 поени (66-76), а во последните три минути влезе со само четири поени негатива (85-89). Бруер потоа постигна четири поени по ред и стави точка на сите дилеми.

Денешниот натпревар беше историски за Охрид од два аспекта: Мајкл Андерсон стана прв играч во постоењето на клубот со трипл-дабл во Првата лига, постигнувајќи 23 поени, 10 скока и 10 асистенции, а екипата ја оствари првата победа како гостин на натпревар од елитната конкуренција. Бојан Трајковски од Феникс беше блиску до неговиот ефект, завршувајќи го мечот со 26 поени, 13 скока и 6 асистенции.