Самарџиев: Срам ми е - дојдовме како туристи, а МЗТ ни одржа лекција по кошарка!

13 февруари 2025 - 22:33

Работнички претрпе еден од најтешките порази во своето 33-годишно ривалство со МЗТ Скопје во домашните натпреварувања, откако во вечерашното четвртфиналето од Купот на Македонија загуби со огромни 35 поени разлика (63-97).

Тренерот на центарци, Горан Самарџиев, беше брутално самокритичен по средбата.

„Срам ми е, дојдовме како туристи во Гевгелија, без жар и желба за победа. Ја преземам одговорноста за поразот, можеби јас не ги тренирам и подготвувам добро. МЗТ ни одржа лекција по кошарка и покажа дека е најсериозен кандидат за трофејот“, изјави Самарџиев.

Натпреварот беше израмнет само во првата четвртина, по што тимот од Аеродром целосно ја презеде контролата и го наметна своето темпо. Аеродромци, кои го бркаат 13-тиот трофеј во ова натпреварување, во утрешното полуфинале ќе ги одмерат силите со Пелистер.