Работнички растурен среде Скопје, групната фаза веќе е само - сон (ФОТО)

Во првото коло од турнирот што се одржува во Скопје, најтрофејниот македонски клуб доживеа убедлив пораз (57-87) од можеби најголемиот ривал за првото место Рапид Букурешт и во следните два круга ќе му треба чудо и услуга од другите за да се надева на европска кошаркарска есен. Романците во Кале се покажаа како поорганизиран и поквалитетен тим и заслужено стигнаа до триумфот.

Реновираниот Работнички се одржуваше во игра во првото полувреме, на моменти знаеше да премине и во водство иако и во тие 20 минути Рапид беше подобар тим. На минута пред големиот одмор беше 41-41, а гостите заминаа на пауза со предност од 45-41.

Вториот дел не беше ни сенка на првиот, Работнички тотално потона и не успеа да го следи темпото на разиграниот противник. По 47-47, Рапид направи 17-6 за водство од 11 разлика со која и заврши третиот период (66-55). Последните десет минути македонскиот претставник тотално се распадна и дозволи дебакл пред своите навивачи.

Трајс и Џелетовиќ со по 15 поени беа најефикасни кај Работнички, но нашиот тим беше надигран во сите елементи. Оствари 16 скока помалку од Рапид (28/44), загуби четири топки повеќе (13/9), а погоди само три тројки од 20 шута. Натпреварите против Сабах и Донар Гронинген ќе бидат можност да се поправи впечатокот кога групната фаза останува само сон.

Во првиот натпревар од турнирот во Скопје, азербејџанскиот Сабах го победи Донар Гронинген со 75-72.