Речиси три милиони луѓе бараат Аргентина да биде исфрлена од Мундијалот

13 јули 2026 - 21:46

Се наближуваат полуфиналните натпревари на Мундијалот, утре ќе се сретнат Франција и Шпанија, а в среда Аргентина и Англија (двата натпревари почнуваат во 21 часот), но паралелно на социјалните мрежи се засилува и кампања против Аргентина.

Додека интернетот е преплавен со мемиња и објави во кои се тврди дека целиот свет ќе навива за Англија во среда вечер, на неколку платформи за онлајн петиции луѓе бараат Аргентина да биде исфрлена од Светското првенство.

Особено внимание привлече страницата „argentinaout.com“, чиј наслов гласи: „Исфрлете ја Аргентина“.

„Очигледно е дека ФИФА и судиите се пристрасни кон Лионел Меси и Аргентина. Зошто остатокот од светот би се натпреварувал кога сè е однапред одлучено? Исфрлете ја Аргентина од Светското првенство и дајте им фер шанса на останатите“, стои во образложението на петицијата.

Досега петицијата ја потпишале речиси три милиони луѓе, а бројката продолжува да расте од минута во минута.

Уште од првото коло од групната фаза се појавија тврдења дека ФИФА ѝ помага на Аргентина. До полуфиналето кое следува, на социјалните мрежи се појавија десетици  снимки во кои се тврди дека противниците на Аргентина биле оштетени, како и мемиња во кои „гаучосите“ се нарекуваат „миленици на ФИФА“.