Почина претседателот што го донесе Панчев во Интер

31 мај 2025 - 17:45

На денот на финалето од Лигата на шампионите во Минхен, Интер објави тажна вест, дека во 84. година од животот, починал поранешниот претседател на клубот Ернесто Пелегрини.

Тој беше прв човек на „нераѕурите“ во периодот од 1984 до 1995 година и во неговиот мандат, во Интер дојде македонскиот голгетер Дарко Панчев, во 1992 година. Покрај него, во тој период во миланскиот клуб пристигнаа и неколку големи ѕвезди на светскиот фудбал како Лотар Матеус, Андрес Бреме, Јирген Клинсман, Карл Хајнц Румениге, Матијас Замер, Денис Бергкамп итн.

Додека Пелегрини го водеше клубот, Интер го прекина 26-годишниот пост на европска сцена и ги освои трофеите во Купот на УЕФА во 1991 и 1994 година, а во 1995 на негово место дојде Масимо Морати.