Напаѓач на Нотингем Форест во кома откако во полн трк се удри во статива

14 мај 2025 - 08:29

Нигерискиот репрезентативец од редовите на Нотингем Форест, Таиво Авонији е опериран и ставен во индуцирана кома откако на мечот против Лестер во неделата доживеа силен судар со стативата.

Напаѓачот се обиде да искористи еден центаршут на Еланга, но беше во полн трк и не успеа да се запре по што заврши во стативата. Авонији бил опериран веднаш по натпреварот и задржан е в болница поради сериозни повреди на абдоменот.

Интересно е тоа што тој не се повлече, туку по судирот остана на теренот и покрај тоа што не делуваше добро на теренот. Во игра влезе на седум минути пред крајот, на местото на Сангаре и не е исклучено тоа да му биде последен натпревар за оваа сезона.

Поради ситуацијата со Авонији, по мечот дојде до жесток судир меѓу газдата на Нотингем Форест, Евангелос Маринакис и менаџерот Нуно Еспирито Санто. Грчкиот милијардер го обвини Еспирито Санто и неговиот стручен штаб дека не донеле правилна одлука, туку требало веднаш да го испратат Авонији на прегледи со цел да не дојде до посериозни повреди.