Клоп бесен на телевизиите: Вие сте виновни за сѐ што ни се случува!
Тој потенцира дека поради нив фудбалот сезонава станал пекол за играчите, но и за сите останати кои активно учествуваат во натпреварувањата ширум планетата.
„Ако продолжиме да играме преку недела во европските натпреварувања, а преку викенд во домашните, не сум сигурен дека ќе ја завршиме сезоната со 11 здрави фудбалери. Знам дека вас не ви е грижа за тоа, а тоа е и најголемиот проблем во светскиот фудбал“, рече Германецот во директното обраќање кон британските телевизии „Скај спортс“ и „БТ спортс“.
Оваа изјава на Клоп беше дадена веднаш по средбата со Лестер, но не беше емитувана на ниту една британска телевизија. Јавноста дозна за неа дури откако американската ТВ-куќа НБЦ ја емитува, по што стана вирална.
Британските телевизии годишно даваат милијарди фунти за ТВ-права и инсистираат сите натпревари да се одиграат според предвидениот план и тоа во сите натпреварувања, со цел да си ја вратат инвестицијата. Без разлика што е тоа погубно за здравјето на фудбалерите во време на пандемија со коронавирусот.