Ибрахимовиќ не доаѓа во Милан: Неговата замена нема да им се допадне на навивачите

Бројот на повредени фудбалери можеби и не е така голем, но проблемот за „росонерите“ што се повредија клучни играчи како Џакомо Бонавентура, Лукас Билја, Матео Мусакио, Матија Калдара и Алесио Ромањоли и тие со месеци ќе бидат надвор од терени. Ромањоли би требало да биде фит до крајот на годината, но сезоната за Бонавентура е завршена.

Златан Ибрахимовиќ беше приоритет број 1 на Милан за зимава, но се чини дека по последните информации голгетерот ќе остане во МЛС-лигата во тимот на Лос Анџелес галакси. Последните шпекулации во италијанските медиуми велат дека нова опција за трет напаѓач на „росонерите“ е Марио Балотели. Италијанецот има историја во дресот на миланскиот тим и играше сосема солидно, но на крајот не си замина во најдобри односи со навивачите.

Неговиот агент Мино Рајола го понудил во Милан, а Леонардо сериозно размислува да му даде шанса на Италијанецот иако во Ница сезонава игра очајно. На стартот на сезоната беше исфрлен од тимот поради вишок килограми. Можеби добра вест е што Балотели би дошол без обештетување на „Сан Сиро“, а Гатузо би го користел како трет напаѓач, односно замена за Патрик Кутроне и Гонзало Игуаин.

Сеск Фабрегас и натаму е фаворит број 1 да го засили средниот ред на Милан и да биде замената за повредениот Лукас Билја, со оглед на неговиот статус во Челси и фактот дека договорот му истекува во јуни 2019 година. Неговиот спонзор ПУМА исто така притиска Шпанецот да се пресели во редовите на Милан и тоа уште во јануарскиот преоден рок.

Во дефанзивната линија, каде тимот има најмногу повредени фудбалери една од главните цели е Родриго Кајо, кој игра за Сао Паоло во Бразил. Милан зимава ќе ги засилува сите линии во тимот со цел да го задржи четвртото место на табелата и конечно да се врати во Лигата на шампиони.

Засега сигурно е дека Лукас Пакета ќе го засили Милан оваа зима, кој доаѓа од Фламенго за 35 милиони евра.