Академија Пандев на репрезентативен погон – промовирани и Маркоски и Трапановски!
Пандевци сезонава ќе биде буквално на репрезентативен погон, зашто во Струмица дојде Марјан Радески, А-репрезентативецот од Шкендија, потоа Никола Серафимов, младинскиот репрезентативец до 21 година, Бојан Димовски, младинскиот репрезентативец до 19 години, а сега се приклучуваат и членот на „златната генерација“ од Евро 2017, Маркоски, како и младинскиот репрезентативец од генерацијата на Елиф Елмас, Трапановски.
Ако се додаде дека во тимот се и Марио Крстовски и Дејан Миловановиќ, исто така младински репрезентативци, плус Ѓорѓи Стоилов кој беше повикан и во А-тимот на нашата селекција, струмичани склопија исклучително млад и перспективен тим, кој предводен од тренерот Александар Таневски ќе се бори и за трофеите, но пред сè за излез во Европа.
Маркоски, бившиот фудбалер на Работнички и Македонија ЃП доаѓа кај Пандевци од чешка Карвина, а претходно беше дел од АЕЛ Лимасол и Спартак Трнава. Маркоски е повремен и сениорски репрезентативец. Трапановски, пак, е повратник во тимот на Академија Пандев, кој играше во Татран Прешов, Викторија Жижков и Подбрезова, а е првиот фудбалер кого Академија Пандев го продаде пред неколку години на Славија Прага.
Пандевци неодамна се засилија и со Милан Томиќ, фудбалерот на белградска Црвена Звезда, кој има 20 години и само го надополнува тимот од млади и перспективни фудбалери на струмичкиот клуб.