Ѓоковиќ, сепак, немоќен: Алкараз на 22 години го комплетира „кариерниот Слем“!

Српскиот ас не успеа да направи уште еден подвиг откако во полуфиналето го елиминира Јаник Синер и остана без својот 11. трофеј во Мелбурн. Од друга страна, на само 22-годишна возраст, Алкараз стигна до седмиот Гренд слем трофеј и го комплетира кариерниот Слем бидејќи има барем по една титула на сите четири Гренд слем турнири. Тој е најмлад во историјата на тенисот кому му успеало такво нешто.

Финалето не почна добро за Шпанецот бидејќи Ѓоковиќ го одигра првиот сет како во најдобрите денови и за само 33 минути игра поведе со 1-0, освојувајќи го тој сет со 6-2. Сепак, се покажа дека Србинот го извадил најдоброто од себе бидејќи потоа доживеа голем пад во играта и Алкараз одговори на идентичен начин, со 6-2 за 35 минути.

Слична слика и во третиот сет, Ѓоковиќ беше немоќен, не успеа да загрози ниеден сервис на противникот, додека Алкараз направи брејк во петтиот и потоа во деветтиот гем за водство од 2-1. Кобен за шпанскиот тенисер можеше да биде вториот гем во последниот сет бидејќи во него пропушти дури шест брејк топки. Ѓоковиќ некако успеа да се извлече, имаше и брејк топка на 4-4, а потоа Алкараз, на сервис на противникот, при 6-5, ја искористи првата меч топка и дојде до големиот триумф.

Ѓоковиќ остана на 24 Гренд слем трофеи и ја пропушти можеби најголемата шанса за 25. титула, додека Алкараз покажа зошто е најдобар во светот во овој момент.