РФМ ја задржува легендата: Лазаров уште најмалку три години ќе ја предводи Македонија!

Продолжувањето на договорот се случува на десетина дена пред почетокот на Европското првенство на кое ќе учествува и Македонија.

„Официјално ја продолживме соработката со селекторот на нашата машка сениорска репрезентација, Кирил Лазаров, со договор до 2029 година. Веруваме дека континуитетот и стабилноста се клучни за напредокот на националниот тим и македонскиот ракомет во целина. Се надеваме на успешна и плодна соработка во наредниот период, во кој со заеднички труд, посветеност и јасна визија ќе продолжиме да остваруваме добри резултати и да го развиваме нашиот спорт“, рече претседателот на РФМ, Алекснадар Стефанов.

Легендарниот ракометар го предводи националниот тим од февруари 2021 година и до моментов е најдолговечен селектор во историјата на македонската репрезентација. Ниеден пред него не го водел националниот тим повеќе од ттри години, колку што на клупата без Веселин Вујовиќ и Ивица Обрван.

„На заедничко задоволство ја продолживме соработката со Ракометната федерација на Македонија. Водењето на национален тим, особено на својата земја, е голема чест и одговорност. Благодарен сум за укажаната доверба и поддршка.

Пред нас е период исполнет со сериозна работа, јасни цели и високи очекувања. Со заеднички труд, дисциплина и целосна посветеност ќе продолжиме да работиме на напредокот на националниот тим и достоинствено претставување на Македонија, со фокус на стабилност и резултати на долг рок“, рече Лазаров.

Под негово водство, Македонија не пропушти ниедно големо натпреварување, а серијата ќе продолжи годинава со учеството на континенталниот шампионат.