Денеска сите во „Борис Трајковски“: Македонија игра против Грција – влезот е слободен!

04 јануари 2024 - 11:39

Македонската ракометна репрезентација денеска и утре против Грција во „Борис Трајковски“ ќе ги одигра последни две контролни средби во пресрет на ЕП 2024 во Германија, каде што ќе почнеме на 10 јануари со спектакуларен меч на фудбалски стадион против Франција.

Денешната пресметка од 17 часот воедно ќе биде единствена можност за македонските спортски фанови во живо да ги видат и поздрават избраниците на селекторот Кирил Лазаров, со оглед што вториот дуел против Грците ќе биде од затворен карактер. Поради тоа, влезот за овој дуел е бесплатен, па се очекува повеќе од солидна посетеност и голема поддршка за жолто-црвените во дуелот против јужниот сосед.

Македонија и Грција веќе одиграа пријателски двомеч и тоа лани во октомври во Солун, каде што првата средба заврши со нерешен резултат (29-29), додека нашите момци славеа во втората пресметка (23-22). Претходно на подготвките за ЕП, македонските ракометари во Стара Пазова одиграа контролен дуел со Црна Гора и тоа во меч со три полувремења, кој на крајот заврши со наша победа со 54-51.

Избраниците на Лазаров втората средба на континенталниот собир ќе ја одиграат против Германија на 12 јануари во Белрин, а третата против Швајцарија два дена подоцна, исто така во германската престолнина.