Аморим: Треба да бидеме лути и разочарани по ремито со Ливерпул!

06 јануари 2025 - 09:08

Менаџерот на Манчестер Јунајтед, Рубен Аморим, изрази незадоволство по синоќешното реми против Ливерпул (2-2) на „Енфилд“, иако неговата екипа прикажа одлична игра и беше блиску до победа.

Според него, фудбалерите треба да бидат лути и разочарани поради пропуштената можност да го шокираат големиот фаворит.

„Очекувањата беа различни од тоа што се случи на теренот. Во други натпревари се лутам повеќе, бидејќи не можам да ги разберам сите причини за слабостите. Проблемот не е во формацијата или техниката, туку во нешто друго што сè уште не го препознавам“, изјави Португалецот.

Аморим додаде дека тимот треба да биде полут и разочаран од ремито отколку од претходниот пораз од Њукасл.

„Има основа за разочарување, но сакам да останам смирен за да го објаснам правилно. Се наоѓаме во тешка позиција и мора да продолжиме да се бориме за да ја надминеме кризата“, дополни менаџерот.

Иако резултатот го остави разочаран, Аморим гледа само на позитивните работи од натпреварот.

„Играта против Ливерпул ни донесе самодоверба за иднината. Задоволен сум од нашата изведба, но не и од резултатот. Повеќе сум лут за претходните натпревари, каде што не ја покажавме оваа посветеност“, заклучи тој.

Јунајтед со овој бод останува на 13. место на премиерлигашката табела со само 23 бодови, додека Ливерпул останува лидер со двојно повеќе бодови, а има и меч помалку.