Вардар загуби во Нови Сад и го одбра Е. Пелистер наместо Веспрем за противник

27 април 2021 - 18:37

Вардар не можеше да направи нешто повеќе на гостувањето во Нови Сад кај Војводина, во ситуација кога отпатува без 11 ракометари, па загуби убедливо со 24-33. Овој пораз значи дека го освојува третото место во групат Б, поради што дополнително мора да игра осминафинале. Меѓутоа, истовремено тоа значи и дека го избегна Веспрем во четвртфиналето и ќе оди на Еурофарм Пелистер.

И со шестмина кадети во тимот, црвено-црните, сепак ѝ парираа на Војводина и почнаа добро, со тесно водство, на моменти и со два ралзика. Рамнотежата траеше 15-тина минути, докога Вардар водеше со 9-8, а потоа настапи пад. Со серија од 3-0, Војводина направи чекор кон поубедливо водство, а дури и кога постигнаа гол вардарци, тоа остана единствениот нивен во периодот од 16. до 30. минута, па домаќинот го искористи тоа за да ја надгради предноста и да замине на пауза со 16-10.

 Во второто полувреме водството породлжи да расте, Стевче Алушовски се обиде со празна мрежа, со „7 на 6“ во нападот, но максимум што успеа беше да дојде до 24-19 во 47. минута. Беше и плус 11 за Војводина пред крајот, па српскиот шампион запиша убедлива победа, само втора во 14 соочувања со Вардар во СЕХА-лигата.

Дибиров беше најефикасен со девет гола, Калараш постигна седум од седум, а со седум најефикасен беше и Томиќ кај Војводина. Со овој пораз Вардар остана на девет бод, колку што има и Нексе, но поради подобриот меѓусебен однос, тимот од Нашице го зазема второто место што значи го прескокнува осминафиналето и оди директно во четвртфиналето, на Веспрем. Вардар, практично одбра да игра дополнителен натпревар, против Металопластика во осминафиналето, но потоа со победа ќе оди на Еурофарм Пелистер, во борба за Ф4.