Борко Ристовски со фантастичен меч се збогува со Барселона (ФОТО)

19 мај 2018 - 18:59

Македонскиот репрезентативен голман Борко Ристовски на фантастичен начин се збогува со шпанска Барселона, откако денеска запиша 13 одбрани во убедливата победа на шпанскиот шампион против Теукро со 45-25.

Барселона од поодамна е шампион во Шпанија, па денеска на последното коло, Ристовски доби урамен дрес со бројот 12, како спомен од Каталонците и благодарница за неговиот придонес во клубот.

Покрај Ристовски официјално од Барселона се простија и Виран Морос, Валеро Ривера и Алексис Боргес. Ристовски во Каталонија дојде од германски Рајн Некар Левен, а во кариерата бранеше во Германија и за Гумерсбах, во Франција за Кретеј, а во Шпанија уште за Теукро и Алгесирас.

Ристовски сега бара нов клуб, а најблиску е до заминување во Бенфика од Лисабон.