Мурињо добива прилика да се врати во Премиер лигата?

Хау се наоѓа под сè поголем притисок поради променливите резултати и позицијата во средината на табелата, што не одговара на амбициите на клубот. Според информациите на новинарот Алекс Крук, Мурињо е реален кандидат за негов наследник.

„Притисокот врз Еди Хау расте. Според моите информации, Жозе Мурињо е сериозен кандидат да го наследи“, изјави Крук.

„Тој е во добри односи со спортскиот директор Ден Ешворт уште од времето кога беше во Челси. Исто така има силна желба да се врати во Премиер лигата, бидејќи смета дека таму има недовршена работа.“

Њукасл во овој момент се наоѓа на десеттото место на табелата, а сезоната е обележана со нестабилна форма и бројни повреди на клучни фудбалери. Сопствениците од саудискиот Јавен инвестициски фонд имаат високи амбиции, па евентуалниот неуспех да се обезбеди пласман во европските натпреварувања може сериозно да ја загрози позицијата на Хау.

Мурињо во својата кариера веќе ги водеше Челси, Манчестер јунајтед и Тотнем во Премиер лигата.