Бараж: Беса се бори да остане, Башкими да влезе во Првата лига!

Беса ќе го брани прволигашкиот статус, а Башкими ќе се обиде да го пресели противникот во понизок ранг за тие да влезат во нашата најдобра лига.

Мечот првично беше закажан на Чаир, но од безбедносни причини и во соработка со МВР решено е Кавадарци да биде домаќин. Во овој град и вчера се играше бараж, Шкендија Арачиново го победи Осоговор со 2-1 и се пласираше во Втората лига.

Според квалитетот на играчкиот кадар, Беса е фаворит во овој меч, тие имаат прволигашки тим и на хартија се поблиску до остварување на целта. Но, мотивацијата и желбата на Башкими за успех во овој дуел е голема, па ќе направат се за да се качат скалило погоре во македонскиот фудбал.

Во меѓувреме Башкими уште е под истрага на ФФМ за спорниот меч со Кожуф, нејасно е дали евентуална санкција би влијаело на статусот на кумановскиот тим ако тој денеска победи во баражот.

Како и да е, во Кавадарци се очекува голема борба од двете екипи и неизвесен меч.