Ѓоковиќ ги загуби првите два гема, се караше со судијата, па - го прегази Мусети!

Со оваа победа, српскиот ас го продолжува својот поход кон седмата титула на овој турнир, а следен противник ќе му биде Американецот Себастијан Корда, кој претходно го елиминираше Гаел Монфис. Ова беше најдобриот меч на Ѓоковиќ од Австралија Опен, по кој дојде до 96-то мастерс четвртфинале, што го става на второто место во историјата, зад Рафаел Надал, кој има 99.

Иако мечот не започна најдобро за српскиот тенисер, бидејќи Мусети направи брејк и поведе со 2-0, Србинот брзо го најде својот ритам. По израмнувањето на 2-2, судијата Фергус Марфи му додели опомена за одолговлекување, што предизвика кратка расправија. Инцидентот изгледа го мотивираше српскиот ас, кој по тоа доминираше на теренот. Освои девет гема по ред, преминувајќи од негатива 0-2 до водство од 6-2, 3-0. До крајот на мечот, Ѓоковиќ рутински ја приведе работата кон крај и покажа дека неговата форма се движи во нагорна линија.