Шкендија: Проблемот го направија дваесетина навивачи, се оградуваме од нив!

31 март 2025 - 20:47

Фудбалскиот клуб Шкендија излезе со соопштение по повод нечовечкиот настан што се случи во Тетово кога на мечот против Брера навивачите на тетовскиот клуб наместо минута молк за жртвите од Кочани, пееја песни за УЧК.

Со соопштение најпрво излезе Фудбалската федерација на Македонија (ФФМ) која потврди дека Шкендија е предадена на дициплинската комисија и се очекува висока казна поради однесувањето на навивачите.

Сега со соопштение се јави и тетовскиот клуб кој се огради од несовесните навивачи и потенцираше дека останатите во клубот ја испочитувале минутата молк.

Соопштението на Шкендија ви го пренесуваме во целост:

„Шкендија со целосна одговорност ги следи и ги почитува сите институционални одлуки поврзани со чувствителни моменти за општеството. Ние како клуб длабоко ја доживеавме трагедијата која се случи во Кочани, настан кој го потресе целиот народ емотивно се одрази и во нашето секојдневие. Оваа голема таге беше присутна на секој наш тренинг во изминатите денови и се рефлектираше и на мечот против Брера каде што и покрај победата од 2-1 и зачувувањето на првото место на табелата, тимот не прослави на вообичаен начин.

Шкендија ја испочитува минутата молк која беше определена од Фудбалската федерација на Македонија во чест на жртвите. Сепак, за време на овој момент, група на поединци од трибините не ја почитуваа тишината, однесување кое не го претставува ниту клубот ниту навивачката група во целост. „Балистите“ кои вообичаено се позиционирани на трибината „Маршин Беќири“ зад голот, овојпат беа сместени на централната трибина. На мечот присуствуваа околу 3.000-4.000 гледачи, а само група од околу 20 поединци покажаа неодговорно однесување кое не ги одразува чувствата, солидарноста и почитта на поголемиот број од присутните навивачи.

„Балистите“ се нашиот 12. играч и отсекогаш биле нераскинлив дел од Шкендија, но ова неодговорно однесување од мала група на поединци не го претставува ставот на навивачката група која во овој момент е во процес на реорганицација, ниту на останатите членови кои во тој момент реагираа со свирежи како знак на незадоволство кон тие што пееја.

Шкендија изразува жалење за оваа ситуација и повторно го истакнува својот цврст став на почит кон загубените животи и болката низ која поминува целото општество“.