КФМ се премисли: Против Унгарија место во Куманово - во Скопје

13 август 2025 - 20:06

Куманово нема по вторпат во претквалификацискиот циклус да биде домаќин на натпревар на македонската кошаркарска репрезентација.

Кошаркарската федерација на Македонија се премисли и ги оствари најавите кои можеа да се слушнат и пред десетина дена, па дуелот против Унгарија ќе се игра во салата Кале во Скопје. Натпреварот е закажан за 20 август од 19 часот и со него ќе завршат претквалификациите за Светското првенство.

Натпреварот може да биде и од ревијален карактер ако Унгарците в сабота ја победат Романија на домашен терен бидејќи во таков случај, Македонија ќе ги загуби и теоретските шанси за едно од првите две места во групата.