Капиталец во Гевгелија: Кожув се засили со некогаш најдобриот кошаркар во Америка!

22 август 2023 - 11:31

Екипата на Кожув со големи амбиции влегува во овата сезона во кошаркарската Прва лига, што можеше да се заклучи од продолжување на соработката со селекторот Александар Јончовски, но и од ангажманот на одличниот Американец, Колин Слатер (25 год, 185 см).

Станува збор за поранешен кошаркар на Универзитетите Тулан и Лон Бич стејт, зад кого веќе е една сезона во европската кошарка и тоа во дресот на турскиот второлигаш Беледиеспор, каде што просечно реализираше 16,3 поени со 5,2 асистенции. Најинтересен податок за него е што во 2011 година беше прогласен за најдобар кошаркар во САД на своја возраст (види ТУКА), што воопшто не е мала работа со оглед на тоа колкумина се занимаат со овој спорт во „колевката на кошарката“.

Кожув претходно го објави ангажманот на искусниот Димитар Караџовски, како и останувањето на капитенот Горан Главчев заедно со младите и талентирани Илија Колев и Димитар Лазаревски.