Јунајтед е фаворит во финалето од ЛЕ, а сезонава три пати изгуби од Тотнем

Во мечот за трофејот ќе се сретнат англиските екипи Манчестер Јунајтед и Тотнем кои со тоа имаат можност да ја спасат очајната сезона во Премиер лигата каде се наоѓаат во долната половина од табелата, а и да се пласираат во Лигата на шампионите. Финалето е на програмата на 21 мај во Билбао, а интересно е тоа што букмејкерите му даваат предност, иако мала, на Манчестер Јунајтед.

Квотата на „црвените ѓаволи“ во моментов изнесува 2,53, а на лондонскиот тим 2,89 што би требало да гарантира голема борба за трофејот во финалето од Лигата Европа.

Сепак, ваквиот сооднос е мошне чуден, ако се знае билансот во меѓусебните дуели на Јунајтед и Тотнем оваа сезона. Спарс победија на сите три пресметки со Јунајтед од кои две беа во Премиер лигата, а една во Лига купот. Во првенството славеа со 3-0 на Олд Трафорд и 1-0 на својот стадион, а во Лига купот со 4-3 на домашен терен. Освен тоа, Тотнем е во серија од шест меча без пораз од Манчестер Јунајтед, а тимот од Олд Трафорд последен пат славеше на 19 октомври 2022 година, кога негов член се уште беше Кристијано Роналдо.

фото: Premier league