Трогателни сцени: Илјадници со солзи го испраќаат Астори во вечниот дом! (ВИДЕО)

08 март 2018 - 10:57

Денешниот ден дефинитивно ќе биде запишен како еден од најтажните воопшто во историјата на фудбалот, поради погребот на фудбалерот на Фиорентина, Давиде Астори, кој почина во неделата во сон и тоа во Удине неколку часа пред натпревар со Удинезе.

Смртта на 31-годишниот капитен на виолетовите во црно го зави целиот фудбалски свет, а веќе со денови од него се простуваат поранешни соиграчи и фудбалери од целиот свет, без разлика дали лично го познавале.

Неделава солзи се лееја пред натпреварите од Лигата на шампионите, а особено емотивно беше на вчерашниот меч на „Вембли“ помеѓу Тотнем и Јувентус.

Погребот на Астори почна во десет часот, а илјадници луѓе веќе се најдоа пред Базиликата ди Санта Кроче каде што ќе биде изложено неговото тело. Таму веќе е целата екипа на Фиорентина заедно со младинскиот и женскиот тим, како и легенди на светскиот фудбал и негови поранешни соиграчи од клубовите и репрезентацијата на Италија, Франческо Тоти, Џиџи Буфон, Кјелини, Марко Ван Бастен, Џузепе Роси, Ел Шарави, Бернадески...

Причина за смртта на Астори, според официјалните лица, е срцев удар.