Спортскиот директор на Јуве му грмнал на Мота: Срам ми е што те избрав тебе

23 март 2025 - 15:58

Иако до пред две недели менаџментот на Јувентус му даваше поддршка на Тијаго Мота, се се сменило последните денови во кои дошло до драматично влошување на односите меѓу функционерите и шефот на стручниот штаб.

Пред се, тоа се однесува на спортскиот директор Кристијано Џунтоли кој пред неколку дена имал жестока расправија со Мота. Газета дело спорт објави дека Џунтоли и извршниот директор Маурицио Сканавино не биле задоволни од изјавите на Мота по поразите од Аталанта и Фиорентина. Во вторникот тројцата имале ручек на кој една од темите биле резултатите на тимот и играта оваа сезона при што се кренала тензија затоа што тренерот немал концепција за излез од кризата.

Тука пукнало трпението на Џунтоли кој му се развикал на Мота: Ми е срам што те избрав тебе за тренер на Јувентус. Веднаш почнала операцијата за замена на тренерот и било заклучено дека треба да се најде привремено решение, односно стручњак кој ќе ја заврши сезоната, а потоа ќе се бара нов шеф на стручниот штаб.

Целата работа треба да биде завршена до крајот на денешниот ден, а како нов тренер е најавен Игор Тудор, поранешен играч на овој клуб.